LIAN HUSI LIDUN LALEHAN

Lian husi Lidun Lalehan

Ran Nakalen husi ami isin,

Sulin mutuk nakfilak sai mota

Biban sobu lutu, fatuk mak satan

Ba dalan ukun rasik aan.

Kilat musan hedi ami isin,

Klibur nakfilak sai ba liu besi

Hodi hakotu korenti nebe kesi

Atu povu livre husi hamrok ran.

 Haleriiiiiiiiik sai maran. Iha 20 de Maio

Susar sei nakfilak ba knanuk neebe furak

Hodi hamaus lalehan nia tilun

Ba sofrementu povu maubere.

Isin mamuk hakoak tahu malirin

Naklekar to’o sai biti boro

Hodi hafalun metin

Neon hirak neebe sei tauk

Atu povu latauk atu hakilar. 

Molok ukun. husik hela iha sikun

Molok ses ba lidun lalehan

Ami tula tuir iha ami kabas

Rai no Povu Ida nee

Neebe nia mukit seidauk hetan nia rohan

Tamba hodi ran ami kuta imi nia liberdade

Ami kuta airin historia.

Ho isin mate ami troka o nia liberdade

20 de Maio hakilar ba

Husi fuan ho ksolok neebe o iha

Ida nee mak o nia restaurasaun

Viva-viva-viva Timor-Leste.

"OBRIGADO BA HAU HEROI"

 

 

"Obrigado Ba Hau Heroi"

Husi Leten Ás Tara O Mehi

Husi Nakukun Koko Hetan O Fitun

Kalohan Taka Abu-Abu

Hafalun Esperansa Furak

Esperansa Ba Libertasaun.

Husi Foho Kablaki Imi Halerik Liberdade

Husi Foho Matebian imi Hananu, "Patria-Patria"

Tatoli Anin To'o Foho Ramelau

Inan Santa Harohan.

Ho Espiritu Aten Brani

Imi Luta Ba Povu Nia Mukit

Udan, Anin, Imi Lasenti

Kolen Imi La Sura

Hamutuk Natureza Haberan Imi Vida

Obrigado Ba Hau Heroi

Obrigado Ba Liberdade.

Ami Sei Hatutan Historia

Ami Pormete Hodi Prega Iha Ami Fuan

Imi Nia Susar, Matan Wen

Imi Nia Ran,Ruin Soe Namukari Lemorai

Ami Halibur ho Matan Wen

Fatuk No Rai Rahun Maka Troka Imi Isin

We No Kosar Maka Taka Hikas Imi Ran

Ami Hakerek Imi Naran Iha Fatuk Ami Fuan

Husi Ohin Ba Oin No Tinan Ba Tinan.

Obrigado-Obrigado-Obrigado

Ba Historia Patria Timor-Leste.

 

 

For Celebrating Timor-Leste’s Independence day. May 20^th 2016